“Vətəndaşların məhz bayram günlərində zərurət yaranmadığı halda çölə çıxmasını məhdudlaşdırmaq üçün əvvəlki praktikadan istifadə edərək müəyyən qadağalar tətbiq edilə bilər. Misal üçün, xüsusən Abşeron, Sumqayıt və Bakı kimi böyük şəhərlərdə SMS icazə sisteminin tətbiqi mümkündür. Bütün obyektlərin, iş yerlərinin bağlanması isə heç kəsə fayda vermir, heç bir dövlətin iqtisadiyyatı buna tab gətirə bilməz”.
Bunu Pravda.az-a açıqlamasında Milli Məclisin deputatı Naqif Həmzəyev deyib.
Deputat bildirib ki, yoluxma sayındakı artım tempi belə davam edərsə, tam qapanma olmasa da, karantin rejimi müəyyən qədər sərtləşdirilə bilər: “İstənilən halda, müvafiq tədbirlərin həyata keçirilməsi xüsusilə bayram günlərində vətəndaşlar arasında əlaqələri müəyyən qədər azaltmağımız üçün vacibdir. Əks təqdirdə, yoluxma sayının bir gün ərzində 1000 nəfəri keçməsi təhlükəli haldır. Hazırda ölkədə vaksinasiya prosesinə başlanılmasına və risk qrupuna daxil olan vətəndaşların böyük əksəriyyətinin vaksin vurdurmasına baxmayaraq, yumşalmalardan sonra müəyyən dərəcədə unutqanlıq müşahidə edilir, insanların əyləncə mərkəzləri və yaxud da iaşə obyektlərində kütləvi olaraq bir araya gəldiklərinin şahidi oluruq. Eyni zamanda, təəssüflər olsun ki, əldə etdiyimiz məlumatlara əsasən, çoxlu insanların iştirakı ilə xeyir və yas mərasimləri keçirilir. Bütün bunlarla yanaşı, Bakıda ən böyük problem isə, təbii ki, ictimai nəqliyyatla əlaqəlidir. Düşünürəm ki, pandemiya bəlasından tam qurtulana qədər çox diqqətli olmaq və prosesi tam nəzarətdə saxlamaq lazımdır. Tam qapanmanın tətbiq olunmasına ehtiyac görmürəm, çünki restoranlar, mağazalar, müəyyən iaşə obyektlərinin fəaliyyətinə hələ yeni icazə verilib. Müəyyən vaxt məhdudiyyəti tətbiq edilə və yaxud da nəzarət gücləndirilə bilər, əks təqdirdə iş adamlarına yenidən ziyan dəyəcək”.
N.Həmzəyev həmçinin qeyd edib ki, əgər yoluxma sayında azalma olarsa, toyların təxminən 50 nəfərin iştirakı ilə Ramazan bayramından sonra keçirilməsinə icazə verilə bilər: “Gördüyümüz kimi, onsuz da restoranların böyük zallarında masaların hamısı dolur, təxminən 50 nəfər olur və beləliklə, insanlar sosial məsafəni qorumaq şərtilə şənlənə bilirlər. Bu onu deməyə imkan verir ki, may ayının təxminən 14-15-dən sonra ekspertlərin də rəyi ilə toyların keçirilməsinə icazə verilə bilər”.