Fotoları yayılan uşaqlar sığınacağa yerləşdirildibackend
Cəmiyyət
293

Fotoları yayılan uşaqlar sığınacağa yerləşdirildi

  • whatsapp
  • messenger
  • telegram
  • vkontakte
  • odnoklassniki
Xırdalanda acınacaqlı vəziyyətdə yaşayan 4 uşaq artıq Azərbaycan Uşaqlar Birliyinin sığınacağına yerləşdirilib. 
Bu barədə Abşeron rayon İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyasının məsul katibi Hafiz Mikayılov məlumat verib.
Onun sözlərinə görə, artıq Azərbaycan Uşaqlar Birliyinin rəhbəri Kəmalə Ağazadə, İcra Hakimiyyətinin nümayəndələri və polislərlə birgə həmin əraziyə baxış keçirilib və uşaqlar ərazidən təcrid olunub: “Onların antisanitariya şəraitində qalmasını məsləhət bilmədik. Doğrudur, onlar Abşeron sakinləri deyillər, dediklərinə görə, əslən Neftçala rayonundandırlar, Bakının Nəsimi rayonunda qeydiyyatdadırlar. Xırdalanda isə kirayədə qalırlar. Biz onların şəxsiyyətini araşdıracağıq. Ananın narkotik istifadəçisi olub-olmadığı yoxlanandan, müəyyən problemləri aradan qalxandan sonra ona şərait yaradılacaq. Sonra istəyərsə, uşaqlar geri qaytarıla bilər, istəməsə, uşaq evlərindən birinə yerləşdiriləcəklər”.
H. Mikayılov həmçinin bildirib ki, qadının narkotik aludəçisi olduğu təsdiqlənsə, yəqin ki, uşaqlar ona verilməyəcək.
“Uşaqların anası normal adama bənzəyir. Sadəcə, bir qədər çətinlikləri olub. Biz onları aradan qaldırmağa çalışacağıq ki, ana uşaqlarını saxlamağa qadir olsun. Uşaqların anası ilə qeyri-rəsmi nikaha girmiş atası var. Onunla bağlı da araşdırma aparılacaq və yəqin ki, hüquqi sənədlər toplanacaq və məhkəmə qarşısında aliment məsələsi qaldırılacaq”, – İcra Hakimiyyətinin rəsmisi əlavə edib.

Qeyd edək ki, Xırdalanın “Bombey” adlandırılan məhəlləsində 4 uşağın acınacaqlı vəziyyətdə qalması ilə bağlı məlumat vermişdik. Uşaqların küçədə paltarsız gəzdikləri və təkbaşına yaşadıqları bildirilirdi. // “Qafqazinfo”