“Su resursları yenidən qiymətləndirilməsi çox vacibdir”.

APress.az xəbər verir ki, bunu bu gün Ağdam şəhərində səfərdə olan Ölkə ərazisində su ehtiyatlarından səmərəli istifadənin təmin edilməsi, su təsərrüfatının idarə olunmasının təkmilləşdirilməsi və bu sahədə fəaliyyətin əlaqələndirilməsi məqsədilə yaradılmış Komissiyanın sədri, Baş nazirin müavini Şahin Mustafayev bildirib.

Baş nazirin müavini deyib ki, hazırkı qiymətləndirmələr təqribidir: “Yeraltı su həcmlərinin dəqiqləşdirilməsi üçün müşahidə, kəşfiyyat quyularının qazılması nəzərdə tutulur, bu quyuların yerləri müəyyən ediləcək. Ağdam rayonunda da ilk növbədə bu istiqamətdə işlər görüləcək. Bu, içməli su baxımından çox vacibdir. Eyni zamanda işğaldan azad olunmuş ərazilərdə yerüstü su ehtiyatlarının da qiymətləndirilməsi zəruridir. Bu məqsədlə artıq 13 hidroloji stansiyanın quraşdırılması nəzərdə tutulur. Bu yerlər də təqribən müəyyən olunub. Amma bu sahədə də əlaqələndirməyə çox böyük zərurət var. Çünki su quyularını harada qazmaq lazımdır, bu, digər planlarla necə uzlaşır, müəyyənləşdirilməlidir. Ona görə də bugünkü iclasda həm Prezident İlham Əliyev tərəfindən yaradılmış Əlaqələndirmə Qərargahının üzvləri, həm də Azərbaycan Prezidentinin Ağdam rayonunun işğaldan azad olunmuş əraziləri üzrə xüsusi nümayəndəsi iştirak edir. Biz bütün əlaqələndirmə işlərini həyata keçiririk. Bugünkü iclasın Ağdamda səyyar qaydada keçilməsi də bunun bir göstəricisidir”.

Ş. Mustafayev işğaldan azad olunan ərazilərdə 13 iri çay, 9 su anbarının olduğunu bildirib.

Baş nazirin müavini deyib ki, Komissiya çərçivəsində də təkliflərin olduğunu, bu təkliflərin öyrəniləcəyini deyib: “Bu təkliflər öyrənilərək Əlaqələndirmə Qərargahına və yekunda dövlət başçısına təqdim olunacaq. Bu təkliflər sırasında relyefə uyğun yeni su anbarlarının tikintisi məsələsi də var. Bu təkliflər ətraflı araşdırılacaq”.