“COVİD-19 bəlasından qorunmağın, o cümlədən qurtulmağın ən optimal yolu vaksinasiyadır”.
APress.az-ın məlumatına görə, bunu tanınmış həkim Vaqif Qarayev deyib. O, COVİD-19-a qarşı vaksinasiyanı davamlı təbliğ edən həkimlərdən biri olduğunu vurğulayaraq dünya təcrübəsindən də söz açıb:
“İsrail kütləvi vaksinasiyanın hesabına normal həyata qayıdıb. Hindistan isə sözün əsl mənasında yanır, orada vəziyyət çox pisdir. Qeyd etdiyim kimi, koronavirusdan qurtulmağın yolu peyvənləmədir. Sübut üçün İsrail təcrübəsini də dedim.
Amma bir məsələ var. Dövlət müəssisə və idarələrində insanları işdən çıxartmaqla hədələyirlər. Bununla bağlı şikayətlər çoxdur, xüsusən təhsil sahəsində. Belə təbliğat olmur!. Vaksinasiya pambıq planı deyil ki, yuxarılara hamıdan tez hesabat verəsiniz”.
V.Qarayev bildirib ki, vaksinasiya günü özünü xəstə hesab edənləri, müxtəlif problemlərdən ciddi müalicə alanları məcbur etmək olmaz: “Nəticə pis ola bilər. Vaxtı gələndə özləri gedib peyvənd vurduracaqlar”.
Sfera.az