Xəbər verdiyimiz kimi, bir müddət öncə İran İslam Respublikasının Azərbaycandakı səlahiyyətli səfiri və dini lider Seyid Əli Xamneyinin Bakıdakı rəsmi nümayəndəsi Əli Əkbər Ocaqnejad general Polad Həşimovun ailəsini ziyarət edib.
Səfir general Qasım Süleymani adına olan lövhə və medalı şəhid Polad Həşimovun xanımına və övladlarına təqdim edib.
Bu hadisə generalın anası və bacısı tərəfindən normal qarşılanmayıb, medalın geri qaytarılması tələb olunur.
Medalın geri qaytarılma səbəbi ilə bağlı general Polad Həşimovun bacısı Arzu xanım Sfera.az-a danışıb. Şəhidin bacısı medalın təqdimatının ikitirəliliyə yol açdığını deyərək, qardaşının adının siyasi məsələlərdə hallandırılmasını əleyhinə olduğunu bildirib:
“Medal Bakıda uşaqlara, Polad Həşimovun xanımına təqdim olunub. Medalın veriləcəyini əvvəlcədən bilmirdik. Biz qəti şəkildə tələb edirik ki, medal geri qaytarılsın. Ümid edirəm hansısa tədbir görüləcək. Medalın verilməsi ölkədə ikitirəlik yaradıb. Mən qardaşımın adının siyasi məsələlərdə hallanmasını istəmirəm.
O sadəcə torpağı üçün vətəni üçün vuruşan qəhrəman olub. Polad Həşimov dövlətinə sədaqətlə qulluq edən insan olub. Ona İran tərəfindən hansısa medalın təqdim olunmasına qarşıyıq. Medal alınanda bizə deyilməmişdi. Medaldan imtina qərarımızı qardaşımın ailəsi mətbuat vasitəsi ilə yəqin ki, görüb. Anam da bu mövzuda mənimlə eyni fikirdədir”.
Sfera.az