Moskva və Ankara bəzi məsələlərdə fərqli fikirdədirlər, lakin Rusiya ilə dialoqun saxlanılması və qarşılıqlı əməkdaşlığı davam etdirmək zəruridir.

APress.az xəbər verir ki, bunu Türkiyənin xarici işlər naziri Mövlud Çavuşoğlu Almaniyanın “Frankfurter Allgemeine Zeitung” nəşrinə müsahibəsində deyib.

Çavuşoğlunun sözlərinə görə, Ankara Moskva ilə işgüzar əlaqə qurmağa çalışır. Eyni zamanda, o, bir sıra regional məsələlərdə Rusiyanın ən vacib aktor olduğunu etiraf edib.

“Müsbət nəticələr əldə etmək həmişə asan olmur, amma mümkündür. Bu, bütün məsələlərdə eyni fikrə malik olduğumuz anlamına gəlmir. Ancaq açıq danışmağı bacarırıq. Dialoq kanallarını açıq saxlamaq vacibdir”.

Xarici işlər naziri Türkiyənin öz milli maraqlarını qorumalı olduğunu və ölkənin təhlükəsizliyinin təhdid altına qoyula bilməyəcəyini vurğulayıb.

“Rusiya bunu başa düşür. Mümkün olduğu təqdirdə Rusiya ilə əməkdaşlıq edirik, amma lazım olduqda isə geri çəkilmirik”.

Unikal.org